城大晚宴 校長高歌籌200萬

【明報專訊】籌款係大學好重要嘅一環，城市大學噚晚舉行一年一度嘅籌款晚宴，今年以「躍動全城」為主題，城大校董會主席黃嘉純（右一）同校長郭位（右二）等嘉賓齊齊打煲呔出席，向來支持城大嘅伯恩光學創辦人楊建文（右三）亦有捧場。首次以校董會主席身分出席嘅黃嘉純話好鍾意今年主題，形容「躍動」好體現到城大係一間年輕、具活力嘅大學，又寄望城大可以跳出香港、晉身世界一流學府之列。郭位校長則開金口唱咗兩首歌，為城大籌得超過200萬元，連同晚宴拍賣等環節，成晚籌得約1500萬元。